काठमाडौं: नेपाल शाकाहारी संघको आयोजनामा ‘अहिंसा महोत्सव नेपाल २०२५’ आज काठमाडौंमा हुँदैछ। प्रदर्शनीमार्गस्थित नेपाल पुलिस क्लबमा आजदेखि तीन दिनसम्म चल्ने यस महोत्सवको उद्देश्य शाकाहारी जीवनशैली, अहिंसा र पशु अधिकारको प्रवर्द्धन गर्नु रहेको छ।

‘करुणाले जोड्दछ’ भन्ने नारासहित सुरु हुने महोत्सवमा प्यानल संवाद, गोष्ठी, योग सत्र, वृत्तचित्र प्रदर्शन, सांस्कृतिक प्रस्तुति तथा ६० भन्दा बढी शाकाहारी खानेकुराका स्टलहरू रहनेछन्। साथै, अहिंसा र पशु अधिकारसम्बन्धी जनचेतना फैलाउने विभिन्न कार्यक्रमहरू सञ्चालन गरिनेछन्।

महोत्सवलाई सफल बनाउन वर्ल्ड भिगन अर्गनाइजेसन, एनिमल सेभ मुभमेन्ट नेपाल, समस्त महाजन, प्रणाम श्री कृष्ण प्रणामी समाज र एनिमल नेपालले सहकार्य गरेका छन्। प्रवेश निःशुल्क रहने भएकाले आयोजकले इच्छुक सबैलाई महोत्सवमा सहभागी हुन आह्वान गरेका छन्।