कास्की — नेपालमा दुध उत्पादन वृद्धि गर्ने उद्देश्यले भारतले उपहारस्वरूप दिएको मुर्रा जातको राँगामध्ये एकको मृत्यु भएपछि राष्ट्रिय पशु प्रजनन् कार्यक्रम प्रभावित भएको छ। पोखरास्थित कार्यालयमा रहेका १५ मध्ये ‘रोहित’ नाम दिइएको मुर्रा गत साउन ३० गते भ्यागुते रोगका कारण मरेको हो।

कार्यालयका सूचना अधिकारी डा. महेन्द्र मल्लका अनुसार साउन १७ देखि बिरामी परेका रोहितलाई उपचारमा राखिएको थियो तर अन्ततः बचाउन सकिएन। यस मुर्राबाट वीर्य संकलन हुँदै आएको र ३ हजार डोज स्टक भएको भए पनि नियमित उत्पादनमा भने क्षति हुने भएको कार्यालयका निमित्त प्रमुख विश्वनाथ गौतमले बताए।

उनका अनुसार मृत राँगासँगै वीर्य संकलन गर्ने पोखराका दुई मुर्रामध्ये अब एक मात्र बाँकी छ। “नियमित उत्पादनमा घाटा हुन्छ, तर उपलब्ध स्टकले तत्काल सन्तान उत्पादनमा समस्या हुँदैन,” गौतमले भने।

भ्यागुते रोग पास्चुरेला मल्टोसिडा जीवाणुका कारण हुने खतरनाक सरुवा रोग हो, जसले संक्रमित पशुमा उच्च ज्वरो, घाँटी सुन्निने, घ्यारघ्यार आवाज आउने लगायत लक्षण देखाइ तीन दिनमै मृत्यु निम्त्याउन सक्छ। रोहितलाई क्वारेन्टाइनमा राखिएकाले अन्य पशुमा रोग नफैलिएको कार्यालयले जनाएको छ।

भारतले दिएको १५ मध्ये ७ वटा मुर्रा पोखरा, ५ वटा लहान र ३ वटा बाँके पठाइएको थियो। पोखरामा रहेका पाँच मुर्रा अझै तालिम चरणमा छन्। मृत राँगोको अन्त्येष्टि पोस्टमार्टमपछि गरिएको छ।

यस घटनाबारे कृषि तथा पशुपन्छी विकास मन्त्री रामनाथ अधिकारीले मन्त्रिपरिषद्मा जानकारी गराइसकेका छन्।