औषधि पसल बन्द गरी आन्दोलनमा सहभागी हुन संघको अनुरोध
काठमाडौं । औषधि ऐन २०३५ को संशोधित दफा ११ को उपदफा ३ को संशोधन र उपदफा ५ खारेज गर्न माग राख्दै औषधि व्यवसायीहरूले आइतबार देशभर औषधि पसल बन्द गर्ने भएका छन्। नेपाल पशुपन्छी औषधि व्यवसायी संघका महासचिव सादुराम ढकाल (आशिष) का अनुसार बिहान ११ बजेदेखि मध्यान्ह १२ बजेसम्म सबै औषधि पसल एकसाथ बन्द रहनेछन्।
संघले देशभरका औषधि व्यवसायीलाई औषधि व्यवस्था विभागको प्राङ्गणमा उपस्थित भई विरोध कार्यक्रममा सहभागी हुन आह्वान गरेको छ। पूर्व निर्धारित संघर्ष कार्यक्रमअनुसार नै आइतबारको बन्द र विरोध कार्यक्रम अघि बढाइने महासचिव ढकालले बताए।
औषधि ऐनमा गरिएको संशोधनले व्यवसाय सञ्चालनमा अप्ठ्यारो प्रावधान थपिएको भन्दै औषधि व्यवसायीहरू सुरुदेखि नै असन्तुष्ट हुँदै आएका छन्। संशोधित व्यवस्थाविरुद्ध तीन पेशागत संगठन—नेपाल पशुपन्छी औषधि व्यवसायी संघ, नेपाल औषधि व्यवसायी संघ र नेपाल आयुर्वेद औषधि व्यवसायी संघ—ले पछिल्ला दिनहरूमा धर्ना, जुलुस र दबाब कार्यक्रम सञ्चालन गर्दै आएका छन्।
