भैंसीको मासुदेखि कृषि उपज चीनतर्फ निर्यात सहज बनाउन नेपालको आग्रह
काठमाडौं :नेपालले भैंसीको मासु, दुग्ध पदार्थ, तरकारी, फलफुल र जडीबुटी चीन निर्यातका लागि भन्सार प्रशासनमा सहजीकरण र लचकता अपनाउन आग्रह गरेको छ।
कृषि तथा पशुपन्छी विकास मन्त्रालय र चीनको भन्सार प्रशासनबीच बिहीबार काठमाडौंमा सम्पन्न द्धिपक्षीय बैठकमा नेपालले यस्तो आग्रह गरेको हो। बैठकमा नेपालतर्फको नेतृत्व मन्त्री रामनाथ अधिकारीले गर्नुभएको थियो भने चीनको भन्सार प्रशासनका उपमन्त्री वाङ्ग लिङजुनले चिनियाँ टोलीको नेतृत्व गर्नुभएको थियो।
नेपालले हाल निर्यात भइरहेको थर्मल प्रशोधित भैंसीको मासु र भैंसीको कार्टिलेज (कुरकुरे हाड) बाहेक दुग्धजन्य पदार्थ—घ्यू, नौनी, वटर, छुर्पी—चीन पठाउने प्रस्ताव अघि सारेको छ। साथै, हेलेज, साइलेज जस्ता पशु आहार, कुखुराको मासु र पञ्जा, तरकारी, सुन्तलाजन्य फलफुल, चिया, कफी र जडीबुटी निर्यातका लागि थप सहजीकरण मागिएको छ।
हाल नेपालबाट ३४ प्रकारका कृषि उपज ६१ कम्पनीमार्फत र हरियो घाँस (हेलेज) ५ कम्पनीमार्फत चीन पठाइँदै आएको छ। नेपालले साइलेज निर्यातका लागि पनि चीनसँग प्रस्ताव गरेको छ।
बैठकमा चिनियाँ उपमन्त्री वाङ्गले नेपालबाट कृषि वस्तु निर्यातलाई उच्च प्राथमिकता दिएको बताउँदै “छिमेकी मुलुक भएकाले नेपाललाई विशेष महत्व दिइरहेका छौँ” भन्नुभयो। उहाँले व्यापार सहजीकरण दुवै देशको संयुक्त प्रयासबाट सहज हुने धारणा राख्नुभयो।
कृषि मन्त्री अधिकारीले मासु निर्यातका लागि आधारभूत सर्त (खोरेत–मुक्त क्षेत्र घोषणा, क्वारेन्टाइन मापदण्ड) पूरा गर्ने प्रक्रियामा रहेको जानकारी दिनुभयो। साथै, सुन्तला जातका फलफुल निर्यातमा केही सर्तहरूमा लचकता अपनाइदिन आग्रह गर्नुभयो।
बैठकमा नेपालले कृषि उपज निर्यात सहजीकरणका लागि संयुक्त संरचना स्थापना गर्ने प्रस्ताव गरेको र चीनले त्यसमा सहमति जनाएको मन्त्रालयले जनाएको छ।
