आजकाल संगठनमा अन्य कुरा हाबी हुन खोजेको महसुस हुन्छ
भेट टाइम्स १६ जेठ २०८२ १६:२६
डा. शीतलकाजी श्रेष्ठले पशु चिकित्सकहरूको छाता संस्था नेपाल भेटेरिनरी एशोसिएसनलाई तीन कार्यकाल नेतृत्व प्रदान गरे । दुई वर्षअघि डा. रामकृष्ण खतिवडालाई जिम्मेवारी हस्तान्तरण गरेर निवर्तमान बनेका डा. श्रेष्ठले एनभिएलाई निकै फराकिलो क्षितिजमा उभ्याएको पशु चिकित्सकहरू बताउँछन् । हुन पनि डा. श्रेष्ठले आफ्नो कार्यकालमा पशुपन्छी चिकित्सकको हित रक्षादेखि नीति निर्माणसम्मका विषयमा नेतृत्वदायी भूमिका निर्वाह गरेका थिए ।
आफ्नो कार्यकालमा एनभिएलाई अन्तर्राष्ट्रियस्तरमा पुर्याएका डा. श्रेष्ठ एनभिएको वर्तमान कार्यसमितिले गर्नुपर्ने कतिपय काम गर्न नसकेको बताउँछन् । एनभिएको वर्तमान कार्यसमितिको कार्यलाई औसत बताउने डा. श्रेष्ठलाई भेट टाइम्स प्रतिनिधिले एनभिएको वर्तमान नेतृत्वले समातेको दिशा, अधिवेशनका नाममा हुने अव्यावसायिक गतिविधि, यसको आगामी नेतृत्वको कार्यभारलगायत विषयबारे आफ्ना प्रश्न राखेका छन् ।
प्रस्तुत छ, डा. श्रेष्ठसँग गरिएको सवाल–जवाफको सम्पादित उतार :
एनभिएको वर्तमान कार्यसमिति निवर्तमान हुँदैछ । यसको कामकारबाहीलाई कसरी समीक्षा गर्नुहुन्छ ?
एनभिएको वर्तमान कार्यसमितिको मूल्यांकन गर्नुपर्दा यसको काम–कारबाही औसत रह्यो । हामीले प्रतिबद्धता जनाएका कतिपय कुरा पूरा हुन सकेनन् । एनभिएको आफ्नै भवन निर्माण गर्ने अभियान थालिए पनि त्यो पूरा भएको छैन । हाम्रो पहलकदमी र लबिङमा उठान गरिएका कतिपय मुद्दा या त थाती रहे या उपलब्धिविहीन अवस्थामा रहे ।
साधारणसभाबाट पारित भएका कुराहरू टिमले लागू गर्न खोज्दा असहयोग त नभनौं तर सहयोग नगरिदिने प्रवृत्ति पनि देखियो । यसले कता–कता साधारणसभा पनि कर्मकाण्डमा मात्र सीमित हुँदोरहेछ कि भन्ने मैले महसुस भएको छ ।
वर्तमान कार्यसमितिले गर्नुपर्ने काम के–के थिए र ती अधुरा रहनुका कारण के होलान् ?
मेरो विचारमा समय दिएको भए यो टिमले अझै राम्रो नतिजा निकाल्न सक्थ्यो । तर समय कम दिएका कारण कतिपय काम हुन सकेनन् ।
यसका अतिरिक्त राज्यका कारण पनि कतिपय काम अघि बढ्न सकेन । गर्न सक्ने कुरा पनि उसले सुनेको नसुन्यै गर्यो । भेटेरिनरी सेवाले अत्यावश्यकीय सेवाको मान्यता पाएपछि अरू केही नभए पनि केन्द्रीय पशु चिकित्सालय चौबीसै घण्टा सञ्चालन गरिनु पर्थ्यो । तर राज्यभित्रकै संयन्त्रको लडाइँ, झगडा, इगो र ईर्ष्याले केन्द्रीय अस्पताल चौबीसै घण्टा सञ्चालनमा आउन सकेन । यद्यपि, यसमा सरोकारवालाका हिसाबले एनभिएले वाचडगको भूमिका भने निर्वाह गर्यो ।
पशुपन्छी क्षेत्र र पशुचिकित्सासँग सम्बन्धित कानून निर्माण गर्नुपर्ने थियो । ऐन निर्माणको काम पनि अलपत्र रहे ।
न्यायलयले गर्ने निर्णयमा भर पर्नुपर्ने भएकाले पनि कतिपय काम प्रभावित भए । निजामती सेवामा भेटेनरियनहरूको प्रवेशबिन्दु आठौं तहबाट हुनपर्छ भन्ने मुद्दा ज्युँका त्युँ छ । अर्को महत्वपूर्ण कुरा, पशु चिकित्सकको ऊर्जा लेखनले पनि कानूनी मान्यता पाउन सकेन ।
सारमा भन्नु पर्दा कतिपय एजेण्डामा हाम्रो पहलकदमी नपुगेर निचोडमा पुग्न सकिएन । कतिपय चाहिँ अदालत र सरकार हाबी हुँदा प्रभावित भए । केही मुद्दा सशक्त रूपमा उठाइएको भए पनि ब्याक हुनुपर्यो ।
यी यावत् कारणले एनभिएको वर्तमान कार्यसमितिको कार्यकाल औसत रह्यो भन्ने मेरो बुझाइ हो ।
१०० पूर्णांकमा मूल्यांकन गर्नुपर्यो भने कति नम्बर दिनुहुन्छ ?
एनभिएको वर्तमान कार्यसमितिलाई १०० पूर्णांकमा मूल्यांकन गर्नुपर्यो भने म ७० नम्बर दिन्छु ।
यही जेठ १७ गते एनभिएको अधिवेशन हुँदैछ । यसको मूल मुद्दा के बन्नु पर्छ होला ?
एनभिए पेशागत संस्था हो । पेशागत मुद्दा, भेटेनरियनहरूको हक अधिकार अधिवेशनको मूल एजेण्डा बन्नु पर्छ । अहिले हाम्रो पेशामा विभिन्न किसिमका चुनौती थपिरहेका छन् । त्यसका लागि कसरी संघर्ष गर्ने भनेर पनि अधिवेशनमा छलफल हुनुपर्छ । समग्रमा संगठनलाई गतिशीलता र उचाइ प्रदान गर्न अधिवेशन केन्द्रित रहनुपर्छ ।
एनभिएको आगामी नेतृत्व कस्तो आउनु पर्ला ?
मेरो विचारमा संगठनको नेतृत्वमा को व्यक्ति आउने भन्ने कुरा गौण हुन्छ । जो आए पनि पेशालाई आवश्यक परेका बेला शत प्रतिशत समय दिनसक्ने व्यक्ति आउनुपर्छ । मेडिकल इमरजेन्सी परेको अवस्थामा बाहेक अन्य समय संगठनलाई प्राथमिकता दिने व्यक्ति नेतृत्वमा चयन हुनुपर्छ । घर, परिवार, व्यापार, व्यवसाय र नोकरीलाई थाती राखेर समय दिनसक्ने व्यक्ति आयो भने धेरै राम्रो हुनेछ । यो कुरा संगठनको अध्यक्षको हकमा मात्र होइन, सदस्यसम्मै लागू हुन्छ ।
आगामी नेतृत्वले कसरी काम गर्नुपर्ला ? पूर्वअध्यक्षका नाताले नयाँ नेतृत्वका लागि यहाँका सुझाव के छन् ?
पहिले हामी संख्यात्मक रूपले कम थियौं । व्यक्ति विशेषलाई चिनिन्थ्यो । तर अहिले संख्या बढेको छ । व्यक्ति विशेषबाट भन्दा पनि कामबाट चिनिने समय आएको छ । यस्तो बेला हामीले अन्य मुद्दालाई थाती राखेर पेशागत मुद्दालाई प्राथमिकतामा राख्नुपर्छ । तर आजकाल संगठनमा अन्य कुरा हाबी हुन खोजेको हो कि भन्ने महसुस भइरहेको छ ।
गम्भीर विषय उठान गर्नुभयो । हाबी हुन खोजेका त्यस्ता विषय के होलान् ?
अधिवेशन र चुनावका बेला एनभिएमा ग्रुपिजमको कुरा आउन थालेको हो कि जस्तो देखिन्छ । चुनावी माहोलमा पेशागत मुद्दा हटेर अन्य फ्याक्टर अलिकति आउन खोजेको हो कि ?
एनभिए विशुद्ध पेशागत संगठन हो । उल्लिखित यी अन्य कुरा पेशागत संगठनमा आउन हुँदैन । यसले पेशालाई नकारात्मक असर मात्र पार्दैन, पेशागत मुद्दा पनि ओझेल्याउँछ । सोचनीय कुरा, यसले दीर्घकालीन असर गर्छ र हामीले चाहेको उचाइ र गतिशीलता पक्डन दिँदैन । आगामी नेतृत्वले यी कुरामा ध्यान दिनुपर्छ । नभए हामी पछाडि पर्नेछौं ।
